恐怖的9月份

其實本來9月份係應該開心，
而唔應該覺得恐怖的.....
但今年9月份對小茄來說真係好可怕........

因係呢個9月份小茄斷斷續續病左成個月，
唔係陪韻慈返學時俾人“野”到，
就係俾韻慈“野”到；
唔係俾韻慈“野”到，
就係俾老公“野”到！

最慘的事係小茄呢段時間唔可以食藥，
所以只能靠身體自己慢慢復原......
整個月就係“野”病，慢慢吽好，到好番少少，又被“野”病.....
真係太辛苦了！
希望呢個9月份快D過去，小茄快D好番啦！

話咁快就攪掂的功課！

由於昨天下午要去話劇團上課，
雖然下課回家韻慈嚷著要做功課，
但小茄見到韻慈這麼累，
再加上今天星期六，明天星期日，及下星期一二都不用上課，
所以小茄決定學校的功課還是留待今午做吧！

當韻慈今早去完街街回家，
已經急不及待地嚷著要做功課，
但小茄還有一堆事情需處理，
待小茄把事情處理完可以安坐時，
都已經係中午12：45了！

韻慈終於見到小茄安坐時，
急不及待襯此時機要求做功課......

好啦！就望下你點做功課啦！
(其實韻慈都只係想小茄望下你識唔識做功課，想認下叻咋嘛)

結果韻慈竟然係短短15分鐘，(因中午1點要食午餐)
完成了學校的4樣功課及話劇團的兩項功課......

睇黎......只要韻慈有興趣做，真係可以好快﹠好順利完成！
咁要諗方法令韻慈KEEP住有興趣做佢將來嘅功課，咁小茄就唔駛擔心啦！(太陽還未下山，小茄已經開始發夢了！)

等待的時候.......

今早，

小茄請韻慈自行換衫，

待小茄打完blog之後，

才一起出街行行......

可能小茄實在打得太耐了，

韻慈係換完衫之後，

自己攞左D書出黎自行學習.....

對唔住丫韻慈，我下次打得快D.....

見到韻慈昨天及今早表現，

小茄決定跟韻慈去公園，

讓佢玩一陣滑梯及鞦韆當獎勵啦！

唔返.......返丫！

雖然昨天韻慈係香港話劇團玩得好開心，
但由昨天晚上到今早起床時，
韻慈都話：唔返香港話劇團！

小茄本以為係唔係課堂上發生咩事，
令韻慈有bad feeling......
所以今早在韻慈上洗手間時，
問韻慈點解唔想返呢？
但問左幾次之後，
其實韻慈都唔可以具體答到，
咁唯有小茄引導地問韻慈，
希望可以知道發生咩事啦！

小茄先問：尋日玩得唔開心咩？
韻慈話：開心.....但我唔返啦！
小茄再問：玩得開心，咁玩左D咩？
韻慈都答到.....
小茄再話：老師都話韻慈尋日玩得好開心，表現好好！
韻慈開始講心諗D咩：我想返學多D......
小茄開始明啦！慢慢解釋：你返話劇團都可以返上學，就好似尋日咁，你早上返學，下午先返話劇團囉......
韻慈似明白咁：哦！
小茄再問：咁你下星期仲返唔返話劇團？
韻慈開心地答：返！

原來韻慈冇返興趣班呢個概念，以為興趣班同學校只能選擇其一.......哈哈哈哈！傻妹！

見到韻慈咁鍾意返學，完全唔想放棄上學嘅機會，
學校真係好有佢嘅吸引力.....
小茄好安慰！

韻慈的第一個興趣班＠香港話劇團 (lesson 1 on 270913)

較早前，韻慈有幸獲香港話劇團抽中參加幼兒戲劇課程......

其實小茄同爸爸講笑就話：韻慈咁鍾意扮野，俾佢去話劇團玩下啦！

但事實小茄想希望呢個課程可以幫韻慈更加進步......

韻慈跟小茄期待以久的9月27日終於到啦！

由於話劇團的上課時間在下午，

所以韻慈有充足時間在家食午飯，

係午膳期間，話劇團有職員打電話來，

溫馨地提醒下午上課時間、地點及要帶備的物品.......

小茄沒想到除左學校會咁窩心之外，

就連興趣班都會如此窩心......

小茄跟韻慈預多左少少時間係交通上，

所以早左上到去話劇團，

還好......韻慈可以預早少少適應環境，

讓佢唔好太緊張......

但韻慈還是有一點點的緊張﹣因佢唔敢事先上洗手間(嘻嘻，傻妹)

上課的時間到了！

導師邀請同學們排隊，跟家長say goodbye，

再入課室時，韻慈表現得好合作......

到小朋友都入哂課室時，

其中有小朋友喊，

小茄果刻真係驚韻慈喊，

雖然韻慈有返教會及返學嘅經驗，

因始終呢個係佢第一個興趣班，

佢嘅表現都係較難預測......

小茄在門外望一望：

哦！原來唔係韻慈，韻慈仲好開心咁係度左走走右走走，

韻慈見到小茄在門外，

即刻再跟小茄講：拜拜，陣間見......

(小茄果刻真係覺得擔心係多餘的！！！)

係韻慈上課期間，

小茄決定唔留在話劇團了，

怕影響到韻慈，會令佢分心.....

所以小茄在附近走走......

一個似熟但又變了的地方﹣上環，

係十年多前，小茄係呢度上班，

所以對上環都熟路，

但原來十年間，改變都幾大.......

一小時過得很快，

差唔多時間要接韻慈啦！

小茄返回話劇團，

聽到小朋友的叫聲，

可以很快地認出韻慈叫得真係幾大聲.....

睇黎佢都玩得幾開心！

係下課時，導師跟小茄講番韻慈在課堂的情況：

1. 韻慈都算幾專心：

小茄第一個反應：下！唔係卦！

導師話：係丫，佢幾留心聽人講野，請佢做嘅事，第一時間可以做得到，當然韻慈會鍾意攪老師的顏色筆，但當老師望一望，韻慈就會立即收手坐好......

2. 韻慈都幾合作：

導師話：由於見到韻慈留心，同埋可以即刻做到佢地要求，所以有幾次都請韻慈扮小老師去做示範.....

小茄反應都有點驚訝，因班上有比韻慈年長的小朋友，怎麼論到韻慈呢！？

3. 韻慈真係一個happy girl：

導師話：好欣賞佢成日都咁開心，唔會話因要同媽咪分開而覺得唔開心，幾好喎！

睇黎韻慈玩得都幾開心！

由於時間都好晏了，所以小茄只想快D回家煮飯.....

係小茄煮飯期間，

韻慈已經自己要眠一眠了！

睇黎佢真係幾攰啦！

雖然佢還是要堅持要做功課，

但見到佢咁攰，

還是明天先做功課啦！

番茄薯仔紅蘿蔔洋蔥煲豬骨湯

可能過左秋分，

感覺好似乾乾地，

所以老公尋晚要求要煲湯.......

咁小茄就煲番個湯，等自己唔好咁乾啦........

重新建立午睡時間

其實韻慈早係近三歲時就自行戒了午睡習慣，

小茄一直都覺得冇咩所謂，

但自從韻慈開始上學後，

每朝都6：55起床，

因要預番時間俾佢自行食早餐、換校服等......

而要到晚上9點幾先再上床睡覺......

計計埋埋其實韻慈每天睡眠時間不足10小時，

小茄覺得真係太少了！

上星期韻慈攰到係晚餐期間要求睡覺，

呢個行為係由佢出世到依家第一次發生.....

小茄覺得長久落去唔得啦！

所以小茄決定用咩方法都好啦，

都要韻慈有番個午睡時間......

其實小茄所謂嘅方法，

離唔開搵比比幫手陪睡.....

或者係跟韻慈說小茄好攰需要睡.......

計劃開始了兩天都好成功，

韻慈可以午睡半小時至一小時，

咁計埋晚上的睡眠時間都夠10小時，

雖然都係少左D，但都不會太少......

但明天......韻慈冇得午睡lu.....

唔知會點呢？

白麵包

家中的包包食哂了！

適逢健身室要進行定期維修......

所以小茄留在家做麵包啦！

但原來小茄忘記家中的全麥粉已用完了.....

所以今次唯有只用白麵粉黎整啦！

完成第二次發酵：有點醜樣.....但唔特別再攪了

 焗完出黎個樣.....都幾攪笑......

用左1小時多待涼，切起上黎感覺幾好.....

都算幾完整！

番茄洋蔥紅蘿蔔豬骨湯長通粉(簡單的湯通粉)

點解今早小茄要一早煲落湯？

原因好簡單：一個字﹣懶！

早D煲好湯，可以取出一少部份黎整午餐.....

只要烚少少麵條，今次用長通粉，

再加入已分出來的湯，

就已經係一個好好味嘅午餐了！

番茄洋蔥紅蘿蔔煲豬骨湯

昨天晚上，

韻慈食完意粉後，

突然話要飲湯......

由於沒有預備到，所以韻慈只好失望......

爸爸、小茄又怎會要韻慈這樣失望丫.....

所以就算爸爸今天要出海都好，

也交低了小茄煲湯，

將雪櫃裏的番茄、紅蘿蔔、洋蔥，加少少薑，及幾舊豬骨，

煲番個湯啦！

雖然爸爸不在家，但都會為他留湯，待他今晚回家時飲的.....

又會咁勤力嘅？

今早小茄預備早餐，
因未有咁快可以食得，
所以小茄跟韻慈交代：韻慈，早餐預備中，要等一等......
韻慈聽後回應：唔緊要啦！等我寫下字先.....

小茄聽到甚驚訝地諗：雖然你唔知會寫D咩，但你有呢個心都幾好！努力KEEP住！

190913 中秋的黃昏

感謝主！
讓小茄見到美麗的景色......

兩星期的成長！

正式開學兩星期了！

係呢兩個星期裏，

小茄真係發現韻慈真係長大了！

由學校老師填字的適應表中，

小茄相信韻慈已適應了學校生活；

而且係學校的親子功課中，

小茄知道韻慈鍾意係校內做工作紙......

係丫！小茄第一次聽時都覺得驚訝，

因開學前，小茄一直都會覺得韻慈只識玩，

叫佢做工作紙......冇可能！一定唔肯！

但學校老師真有佢地嘅方法，

令到韻慈發現工作紙學習的樂趣......

最令小茄少少意外的事，

韻慈竟然可以係學校整到個燈籠.....

睇落好似好簡單，

但沒想到韻慈會自己做到！

而且.....都幾靚....

 而且因應課程韻慈做教材，幫助記憶......

 噢！真係諗都冇諗過.......

另外，令小茄更意外的事.....係韻慈的記性.....

一向韻慈在很多事情上，

可能唔上心，所以成日都唔記得！

但對學校所學的中文及英文，

韻慈真係可以記得好好，

成日在家唱出及背出......

短短兩星期，韻慈成長了不少，轉變得很大，

謝謝老師們的教導及愛護！ 

真的發生時，竟然.......

平時韻慈會扮有小朋友喊緊，自己上前呵護.......

但當事情真的發生時，韻慈的反應竟然.........

今早韻慈如慣常一樣上校車，但由於有個同學未上車，
所以司機姨姨決定等一陣......
而小茄跟韻慈隔著車窗玻璃係度玩......
突然坐係韻慈後邊的同學仔喊，
而韻慈竟然呆著之後，
之後不停話：佢喊丫！
之後褓姆姨姨行去喊緊嘅同學位置，了解發生咩事.....
其實果位同學仔嘅家人見到呢個情況已經上了校車安撫了.....

小茄係車窗見到呢個情景......只覺得好好笑！

白多過麥嘅兩溝包

家中的包包已在昨天食完了......

即今早冇自家製包包食.......

所以今天小茄一定要整包包，

但可惜家中只係50g 麥粉，

如果出去待外出買回來，又會攪到D時間好晏.....

所以小茄決定今次只用50g麥粉，

其餘的就用白麵粉補足......

可能白麵粉較多，所以製成品似白麵包多D......

哈哈哈哈！

為身體著想

早係4月初，其實小茄已經上了康文署的健身室簡介會，

但小茄一直以照顧韻慈做藉口，

所以一直都冇使用過健身室.......

直至8月，小茄想減肥，D皮唔想再鬆哂....

所以決定9月，當韻慈開學後就開始啦.....

但可惜當韻慈開學之後，小茄身體唔算太理想，

主要成日都好攰、見暈﹠血壓低......

所以又一拖再拖，遲遲都未開始.....

直至尋晚，老公再提醒小茄：如果再唔開始做運動，真怕下個月要入醫院.......

聽到呢度......小茄諗住橫掂係咁瞓都幫唔到自己，

而且脊骨再係咁都唔係辦法，真係會撐唔住......

所以小茄決定今早一定要去健身室做運動！

目的唔係想減肥，只希望身體可以好番少少.....

今早小茄送了韻慈上校車後，

慢慢行過市政大廈，

之後用＄180去買月票，

買左月票，起碼都可以KEEP住呢個月會做運動卦......

之後去簽場，入到健身室慢慢拉筋，

之後小茄選擇踩健身單車，

因可以坐住做，又可以靠著背脊，

應該唔會太辛苦......

小茄順利係單車上完成30分鐘，

因小茄簽左 1小時，所以想試其他野啦.......

係踩完單車之後，小茄想試“太空漫遊”，

但開始做左幾分鐘之後，

小茄覺得好攰，

記得老公講過千萬唔好死撐，

所以小茄只好飲水，慢慢拉筋，之後離開......

小茄覺得自己好失敗......堅持唔到！

但唔可以打沉小茄嘅決心，

小茄決定休息兩日，下星期一早上再黎過......

因要等身體慢慢warm up......

係做完運動，回家途中，

小茄覺得好開心，個人好開心，唔覺得攰......

雖然尋晚都仲係起左一兩次身.....

但真係完全唔覺得攰......

係沖完暖水涼之後，

成個人覺得：爽丫！成個精神哂！

呢個動力希望可以KEEP住，下星期一再做過！

番茄薯仔豬尾骨湯

立左秋，感覺dry dry地，

好在老公買左番茄、薯仔、紅蘿蔔番黎......

咁不如加豬尾骨及少少薑，

煲番個湯.....

以形補形先(唔知得唔得ga)

突然帶來的驚喜

通常接完韻慈校車後，

小茄都會忙著煮午餐，

與此同時，

小茄會要求韻慈換衫......

平時韻慈一換完衫就會跑入廚房，八卦下小茄做D咩，

但........今日有D唔同.......

今日韻慈竟然冇跑黎八卦，

反而令小茄擔心起來，

所以跑入韻慈房望一望......

原來佢係度講書中......

羅漢果水

最近忙著韻慈開學，

再加上小茄記性差左......

所以有一段時間冇煲涼茶俾老公﹠韻慈飲了！

今次簡簡單單煲羅漢果水俾佢地兩個清熱先......

簡單一個羅漢果加少少南北杏就攪掂了！

第一次分享報告

剛剛收到學校主任電話，
講番今日韻慈係學校分享嘅情況，
老師覺得：
雖然語言技巧可能差少少，
但整體表現得幾好！
以第一次黎講真係已經好好了！
而且韻慈表現得好開心，
好樂意跟同學仔分享......

佢可以簡單講到(小茄相信應該係老師引導之下答)：
D紙係媽咪剪嘅；
個燈籠有燈，又有音樂；
仲示範左開關制嘅開﹠關；
而自己就係個袋入面攞D貼紙出黎貼.......

主任講到呢度，小茄略作少少解釋......

但小茄心諗：
平時韻慈好似成日都好唔專心咁，
但原來佢留意到不少細節，

而且主任都話：韻慈嘅記性都幾好，特別係D細節.....

睇黎小茄要加倍小心！

090913 坐校車的第三天

今日，雖然學校生活開始了第三個星期，
但只係第三天坐校車上車......

雖然起床都唔算太順利，
但食早餐、換衫......等工作都算順利......

小茄可以慢慢地跟韻慈係8點出門口，
但可能校車係路上遇到問題，
所以遲左到站，竟然8：25才到.....
唔緊要啦！
感恩嘅係韻慈在等待期間冇扭計，只係問左一次點解校車還未到ga呢？
最緊要係校車到了.....韻慈可以上校車啦！

韻慈一上到校車，都係選擇坐單邊位，
坐係褓姆後面......
之後就開始say byebye 啦！

突然司機姨姨叫：扣安全帶啦！
小茄見到韻慈自己拉安全帶﹠扣安全帶喎.....
下！佢自己識做！？

************************************************************************
到左要接韻慈放學嘅校車啦.....
又係可能路上繁忙，所以12：25才到.....
小茄終於見到第二架校車司機啦！

而韻慈亦到帶左上星期交回校的小紙燈籠，
咁即係韻慈應該今早已跟同學分享啦！
唔知係點ga呢？暫時唔理住lu~~

回到家，小茄見到學校派左一份特別通告，
原來有一位同學仔上週末患上水痘，
雖然韻慈已打水痘針，
但小茄也要加倍留意.......

又升班

新一個學年，
韻慈除左要開始K1生活之外，
就連係教會都要升班......
冇錯！因之前返開嘅成長班只係容許36個月或以下嘅小朋友，
而韻慈其實已經超齡左6個月ga啦！
只不過教會會安排係暑假後一次過一起升班，
所以係韻慈要升班啦！

今次亦係第一次小茄唔可以陪韻慈一起適應，
因最近小茄搭車會覺得不適，
而返教會需要搭一程隧巴過海，
所以為安全起見，小茄只好留在家休息！
由爸爸跟韻慈一起返教會啦.......

2013﹣2014 韻慈的閱讀計劃

其實係今年3月23日，韻慈參加了由香港公共圖書館主辦的兒童及青少年閱讀計劃，到了年度終結，韻慈係過去5個月睇左百幾本書，雖然唔算太多，但韻慈又真係係書中學到不少知識........

所以小茄決定係新學年開始，韻慈繼續參加呢個閱讀計劃，雖然學校應該有另一個閱讀計劃，但既然韻慈喜歡睇書，咁小茄覺得可以讓韻慈自己從多方面吸取不同嘅知識.....都唔錯丫！

韻慈，你要努力啦！

我想返學

韻慈突然話：媽咪，我聽日想返學丫！

小茄聽後答：聽日唔駛返學ga喎......

韻慈跟住問：點解丫？我好想返學喎......

小茄唯有答：因為學校聽日唔駛開放俾你返學囉.....

韻慈再要問：點解丫？點解唔開丫？

小茄只好答：因為校長老師要休息囉.....

韻慈又再問：點解佢地要休息丫？

小茄認真答：咁校長同老師會攰ga嘛......你諗下校長同老師要花心思教你野，仲要成日睇住咁多同學仔，而可能有其他同學仔會好似你咁鍾意走黎走去，咁老師都好花精神ga......咁就要休息下囉！

韻慈似明話：哦......咁星期一先返學啦！

愛扮野......

愛扮野的韻慈又黎啦！

今次扮D咩？

用少少想像力：

將小抱抱當成BB，而韻慈手執的當成奶樽或水杯就成了！

060913 的黃昏

落左N日雨之後.....

感謝主，讓小茄重遇美麗的"咸蛋黃"

第一次襯韻慈上學時整嘅兩溝包

一直以來，小茄整包包時，韻慈總會在家，係小茄身邊八八卦卦......

所以今次係第一次韻慈不在家時整包包......

材料：
水﹣﹣200g
全麥高筋麵粉﹣﹣175g

高筋白麵粉﹣﹣200g
鹽﹣﹣7.5g(我地唔想太咸，所以減少至5g)
糖﹣﹣15g(唔想太甜，所以減少至10g)
牛油﹣﹣25g(
乾酵母﹣﹣5g

1. 將所有材料放係KitchenAid個bowl度＊注意：酵母同鹽/糖盡量唔好接觸到
2. 用1度攪拌3分鐘至攪混
3. 用4﹣10度高速攪拌15分鐘理麵團慢慢起筋
4. 用手再搓多3分鐘
5. 放係盤中，蓋上保鮮紙，再放係冇著嘅焗爐上隔，下隔放約30度左右暖水，進行3小時發酵＊注意：每隔1小時換一次暖水，麵團會發酵好D
6. 將已發酵的麵團分4份，之後將麵團對摺，再轉90度對摺，收口向下，進行15分鐘鬆弛
7. 將已鬆弛的麵團整型放入焗盤，蓋上保鮮紙，再放係冇著嘅焗爐上隔，下隔放約60度左右暖水，進行50分鐘發酵
8. 完成第二次發酵後，將焗盤取出，用170度﹠15分鐘預熱焗爐

 9. 最後搣走保鮮紙，放焗盤入焗爐，用170度﹠30分鐘，將包包焗熟

 10. 襯包包熱時幫包包甩模

 11. 待包包涼D就可以切片啦！

切完啦！
效果都唔錯......

060913 坐校車的第二天

可能昨天出現了少少技術上嘅問題，
所以韻慈都會話唔想搭校車.......
但當小茄及爸爸再問時，
韻慈又表示想自己返學.....

咁所以......今日韻慈都係自己坐校車的！

而且小茄今早俾左一個小小嘅任務俾韻慈：
要安安全全地帶小燈籠返回學校.....

吸取昨天的經驗，所以小茄跟韻慈今早遲左少少才出門口，
但大約都等左15分鐘，
校車先到車站......
有家長問司機確定到站時間：約8：15.....
咁下星期小茄跟韻慈可以8：00﹣8：05才出門口啦！

韻慈上到校車時，還是跟昨天一樣，選擇坐在單邊最尾的位置......
而今日佢緊緊地執著放有小燈籠的紙袋.....
睇黎韻慈對呢個小任務都幾重視喎！

************************************************************************
到12：15，小茄準備出門接韻慈啦！
到達車站不久，約12：20校車到了！比褓姆事先約定的時間早.....
小茄真係要注意：千萬唔可以miss車！

當韻慈見到小茄接車時，興奮地告知有貼紙.....
但當小茄問番韻慈可否完成任務時，
韻慈只係拉開話題，沒有正面回應小茄！
(咁即係點丫？？？？)

小茄見到韻慈著住校內著的白鞋時，
立即查看書包......
哦！原來返學時嘅鞋仔係書包裏......安心哂！
之後小茄跟韻慈行左一陣超級市場就回家食飯了.....

回到家小茄還是有點唔放心﹣究竟韻慈有冇交到呢？
所以小茄唯有致電學校查詢啦......

主任回覆：話韻慈今早原來已經交回燈籠，待下星期跟班上同學分享&報告後就會帶回家........
主任知道小茄想知道韻慈報告嘅情況，所以應承待韻慈報告後會致電小茄......
老師真係好細心......小茄真係好安心！

韻慈又真係可以完成任務！叻叻！

今日學校派番過去一星期韻慈在校完成的練習......
雖然好簡單，但冇諗過佢會自己完成.....
所以今日小茄決定由韻慈自己完成功課！
佢真係做到ga喎！
哈哈哈哈！真的不能低估你！

自製“小”燈籠

冇睇錯......

小茄又再整燈籠......

原因：好簡單！因上次整的對韻慈黎講太大了！

所以小茄決定再整一個細小小的......

 今次呢個size差唔多啦！

待天氣好時帶回學校啦！

050913 坐校車的第一天

今日係9月5日，
韻慈終於正式開學啦！
冇錯.......之前果8日係學校安排讓K1學生好好適應的漸進式適應班......
今日才真真正正的開學，
韻慈亦要過埋開學的最後一關﹣自行坐校車上學......

其實呢一關小茄真係好緊張，
因韻慈自出世以來，
第一次係沒有爸媽陪同下自己坐車......
亦可能太緊張關係，
所以褓姆姨姨約左8：03上車，
我地記然係7：50已經到達車站......
但今早不停地下著雨，
所以校車係8：20之後才到站......
(聽日會安排係8：00左右出門口)

係等校車期間，
小茄再次提醒韻慈：係校車上，對手要放在大腿上，唔可以攪其他小朋友.....
所以當韻慈上到校車時，
佢自己搵一個單邊尾位，
咁佢就唔會攪擾其他小朋友啦！
小茄見到韻慈坐好之後，不停隔住窗講野，
似係有千萬嘅野要叮囑小茄咁.....
而且還向爸媽飛吻......
到校車要開車時，
韻慈主動跟爸媽say goodbye.....

當時......
小茄覺得韻慈真係大個女了！

唔知陣間12點幾接校車時，韻慈情況會係點ga 呢？

送韻慈上校車後，
小茄在附近行左一陣，
街坊都紛紛問及妹妹係邊.......
小茄好似有少少失落，但也感到安慰......

見到韻慈長大，小茄慢慢已接受了......亦對韻慈嘅適應感安慰......

感謝主！一直由K1面試到依家韻慈上K1嘅帶領，安慰我們一家嘅心情，求主繼續看顧！