聖誕掛飾@K1

話說細佬仔係黎緊嘅單元需要準備小掛飾回校，

咁不如陪細佬仔一齊做下手工，一齊玩下啦！



用紙碟同碎冷整成......
效果都幾得意😇

不請自來去飲茶

今天學校安排去飲茶，從中學習飲茶文化

小茄跟幾位家長決定自行到酒樓飲茶

細佬仔不停地食，不停話：食完啦！
😂😂😂😂真係俾佢笑C了！

期間突然有個同學走過黎多謝小茄之前教佢熨珠.......
冇諗過會有同學還記得，而且特意走過來😘😘😘😘

唔專業嘅理髮師

睇番細佬仔上一次剪髮......原來已經係 3月初嘅事(http://frankiengfung.blogspot.hk/2017/03/blog-post_99.html)了！難怪佢D頭髮咁長啦！

小茄趁小妮子今日全日跟學校旅行，所以帶細佬仔去剪頭髮......

今次試係厚和街嘅一間小型理髮舖，
入到去理髮姨姨就問：細佬仔幾多歲先？
小茄答：3歲.....
姨姨再問：佢乖唔乖先？
小茄心諗：呢樣好難講㗎喎......
只係回答：佢坐得定嘅......
姨姨話：今朝有個 4歲嘅喊足成個過程
小茄聽後話：放心啦！佢唔會喊，剪髮時坐得好定....


開始剪髮，細佬仔完全合作，因貪靚😏😏😏
相反姨姨不停望住電視，小茄幾驚佢會剪到自己或者整到細佬仔.....
完全唔專業，不過 $35.....算啦！下次去第二度剪髮啦！

突如其來的義工？

是日小妮子學校暑假班旅行，小茄本來諗住讓小妮子跟學校老師一起去，所以昨天為佢預備午餐盒(http://frankiengfung.blogspot.hk/2017/07/blog-post_29.html)

但當今早小茄陪小妮子回校，之後老師邀請可以自行搭車到香港公園，所以小茄和兩位家長一起到......

學校老師除了安排同學去玩外，

還安排茶具文物館有導賞員解釋茶具......
小妮子同小伙子都學多左野☺️☺️☺️

家教會活動週 Day 4 @10Jul2017

小茄幫手嘅活動對象係初小-即小一至小三，共 12班，而上星期 3天已完成了小一和小二共 8 班的興趣班，今天早上小茄需要處理 4班小三嘅興趣班，其實今早小茄嘅心情已輕鬆好多，因上星期五已處理小妮子所屬班別(http://frankiengfung.blogspot.hk/2017/07/day-3-7jul2017.html)，一直以來小茄真係唔知點解好怕係小妮子面前認真做野，可能真係怕小妮子突如其來嘅反應或者問題卦......但總算克服了！

雖然今日要處理 4班，但小茄相信一定可以應付.......

幸好今日中途學校有火警演習，可以舒緩一下......


見到同學們嘅創意，又真係幾靚丫！😍

經過 4天 12班初小嘅興趣班，小茄開始露疲態了！只想立即唔出聲......養下把聲😉😉😉

而細佬仔由初段時想曳，到慢慢定番乖番.....good👍🏻👍🏻😘

家教會活動週 Day 3 @7Jul2017

話說昨天提到今天輪到小妮子所屬班別啦(http://frankiengfung.blogspot.hk/2017/07/2-6jul2017.html)！冇錯！第一堂就要面對啦！

當小茄準備要開始講解時，發現滿口「螺絲」，立刻緊張起來，小茄轉一轉身，一位義工姨姨鼓勵，再內心對自己說：要克服！加油！
當小茄再轉身時，一切如常！正常地講解.......

小妮子和同學們努力後嘅成果..........

細佬仔陪了小茄帶 3堂興趣班，雖然第一堂(即小妮子果堂)會攪住家姐，但其實表現得幾好！


小妮子在放學回家後話：今日係第一次可以係學校同媽咪玩遊戲......
小茄再回想一下🤔🤔：🤔又好似係喎！幼稚園果時都只係協助老師工作，升小之後到學校都係攪攤位，而小妮子真係自然去玩，而小妮子要係度聽我講解嘅.....今次真係第一次！

對小茄黎講呢一次嘅經驗真係好寶貴！第一次真係阿女面前做presentation......

家教會活動週 Day 2 @6Jul2017

家教會活動週在昨天開始了(http://frankiengfung.blogspot.hk/2017/07/1-5jul2017.html)，今早小茄如昨天有一樣待小妮子上校車後，本想乘小巴到學校，可惜滿座.......唯有轉乘地鐵啦！

吸取昨天的經驗，小茄今天更利用白板作圖解，感謝老師可即場翻譯，感謝其他義工姨姨協助，

同學們都整得幾靚😍

而細佬仔雖然陪小茄帶連續 3堂興趣班，竟然話好開心，佢識得自己搵位玩車車！今早細佬仔有大進步：慢慢開始唔做跟得阿B，即使小茄要暫離課室都沒有扭計，還肯和叔叔傾計同玩，仲笑到卡卡聲😂😂😂，相信今次活動可以大大咁幫到佢破冰！

明天......到小妮子嘅考驗黎啦！因輪到小妮子所屬班別參與活動啦！唔知會唔會出現問題呢？

牙醫初體驗@5Jul2017

小茄幫細佬仔約今天見牙醫，
因實冇咩特別，小茄只想幫細佬仔養成要定期牙齒檢查，
而且小妮子時經驗告訴小茄，今次都只係會同細佬仔玩下，
唔會做左咩treatment......加上細佬仔較慢熱關係，小茄覺得只係細佬仔唔會嚷著離開，已經係bonus了！(小茄要求係咪好低呢？🤔🤔🤔)

始終細佬仔呢個係新症，所以小茄預早少少到達，處理好文章，等叫名.......

當細佬仔入到診斷室內，小茄意識到細佬仔開始有少少抗拒，所以小茄示意助護可否關門？因怕細佬仔跑左出去.......一如所料：細佬仔唔敢坐在電椅上，醫生安排細佬仔坐在小茄大脾上，而且很細心解釋現時情況，只好用盡一切方法讓細佬仔唔抗拒見牙醫......其實小茄又真係冇咩所謂🤷🏼‍♀️🤷🏼‍♀️，話晒原意不是要洗牙、檢查，只係想佢接觸一下咋嘛......但醫生好犀利......係同細佬仔玩嘅過程中，可以睇到沒有蛀牙、數晒牙仔，仲教埋刷牙、認識埋牙醫用具.......細佬仔玩得好開心丫！😄😄😄😄


而且仲送左好多禮物俾佢添......希望佢年尾再見牙醫時都一樣咁開心啦！醫生希望到佢可以幫佢洗牙，起碼兩隻門牙，睇黎牙醫比小茄更 aggressive😅😅😅😅

家教會活動週 Day 1 @5Jul2017

由今天開始，小妮子可以係學校參與由家教會攪嘅活動週，

小茄應邀回校幫手........熨膠珠☺️

待小妮子上校車後，小茄和細佬仔帶埋手作仔嘅格仔盒(s)乘小巴到學校.......
慢慢準備好所需材料、紙樣，
向其他義工家長講解一下，

 同學們由老師分派座位，安頓下來......

小茄開始講解整個活動流程，再開始協助維持同學們嘅秩序，見到佢地真係好耐心慢慢排好膠珠，小茄真心覺得佢地好犀利啦！而且佢地慢慢交給義工家長熨，小茄之後幫手穿掛飾繩.......如是者，今早和兩班小學生玩啦！😍😍😍

而細佬仔竟然全程好合作，冇扭計，跟住小茄滿場走 - 實行做跟得阿B😄😄😄😄

還有三天，加上其中一節時間係小妮子果班，唔知會點呢？🤔🤔🤔

星期四早上的約會@18May2017

是日 5月 18日(星期四)，小茄繼續陪細佬仔回學校.......

係搭小巴途中，開始下雨😔😔😔，經驗告訴小茄：今早的親子體操會取消.....但橫掂都已經上了小巴，都俾細佬仔去學校睇下、玩下啦！

上到學校，嬸嬸告知：親子體操因天雨取消

在等學校開門時，細佬仔很留心睇住嬸嬸們開帳篷......

當老師問細佬仔：家姐呢？家姐去左邊？細佬仔害羞地慢慢答：番......學.....
😄😄😄😄😄😄細佬仔終於突破自己，肯係屋企以外嘅地方同人對答啦！
(一直以來，細佬仔唔係唔識講野，只係佢選擇只係偷笑而唔答人野)

之後細佬仔主動要求到幼兒班觀察哥哥姐姐上學嘅情況，包括：交功課、放好書包、攞白鞋仔、換鞋仔、放好上學鞋、在課堂外排坐好、聽老師指示入課堂、坐在地墊上看書......小茄在旁講解，細佬仔邊留心睇住邊回應小茄問題......

雖然細佬仔還是會捉住小茄，但已比上星期進步

細佬仔，要繼續努力，對學校嘅老師&環境放開憂慮...

星期四早上的約會@11May2017

又到星期四.....小茄繼續陪細佬仔上學校，

但是原來今早學校有活動，所以是日親子體操取消.....

不過，細佬仔照樣入到學校行來行去，留心觀察幼兒班哥哥姐姐回校後嘅情況....

今早細佬仔一直拖實小茄唔放，好似怕一放手，媽媽便會不見了，傻BB黎嘅！

今早細佬仔有進步丫，係學校時肯發聲啦！仲會say bye bye啦！

細佬仔，要繼續努力！媽媽相信你一定可以好好適應㗎！

新生適應活動：開心樂園(三)@6May2017

又到星期六了，細佬仔要返學校進行開心樂園啦！

小茄想細佬仔別再因見到媽媽而黐實唔投入，所以請爸爸陪同......

而小茄則在家幫小妮子溫習功課.....

當細佬仔回家時，送了兩樣野俾小茄.....

1. 今天的手工--送給媽媽的母親節禮物
係細佬仔整嘅第一份母親節禮物

2. 學校派嘅一大堆文件......
小茄唯有一一睇完，填寫埋可以填嘅表格......黎緊要安排揾醫生簽健康檢查記錄表.....

跟細佬仔第一份親子功課：小袋子

在上星期六的開心樂園，學校派了親子勞作功課(http://frankiengfung.blogspot.hk/2017/04/29apr2017.html)，但小茄知道如果家姐在家時陪細佬仔做呢份功課嘅話，細佬仔可能參與唔到，所以等到家姐上學，而且陪細佬仔做完親子體操(http://frankiengfung.blogspot.hk/2017/05/4may2017.html)回家後一齊做啦！


功課嘅材料包

入面嘅配件
小茄發現配件內的膠縫針......唔好用！當然換番自己的私家縫針啦！

縫完！
之後當然陪細佬仔一齊貼好個公仔啦......

Yeah！總算完成！
雖然第一次跟細佬仔合作，
但都幾靚丫☺️☺️☺️☺️

係咪真係第一次呢？🤔🤔🤔🤔🤔
唔係好記得啦！

星期四早上的約會@4May2017

又到了星期四了！

經過復活節假期及上星期四下雨之後，小茄今早如期陪小頌祈回校參加親子體操，可能已參加學校的新生適應活動，所以細佬仔知道要排隊量體溫、噴鞋仔，等等.......

之後細佬仔主動要求到幼兒班課室，先觀察幼兒班嘅哥哥姐姐回校後換白鞋、交功課、放好書包、等入課室，細佬仔見哥哥姐姐排隊入課室時，佢又跟住想入......當然老師提醒今早不能入，要待星期六先可以㗎！

開始親子體操時間啦！


小茄首先同細佬仔係高班及低班嘅哥哥姐姐後面，但見到細佬仔冇咩反應，唯有轉場-返回幼兒班嘅哥哥姐姐後面啦！當細佬仔係幼兒班嘅哥哥姐姐後面，慢慢跟住做動作啦！直到幼兒班嘅哥哥姐姐開始遊戲，細佬仔又自行轉場-返回高班及低班嘅哥哥姐姐果邊，跟高班及低班嘅哥哥姐姐一起玩大風吹！😅😅😅😅

雖然今早不停轉場，但細佬仔總算願意參與。

細佬仔，要加油喔！💪🏻💪🏻💪🏻

新生適應活動：開心樂園(二)@29Apr2017

上星期六小頌祈開始了學校的新生適應活動(http://frankiengfung.blogspot.hk/2017/04/22apr2017.html)，一星期後.....活動繼續，經過上星期經驗，小茄即使 5點幾起左身，都唔敢再瞓，怕瞓過龍又要匆匆忙忙地趕出門口......

小頌祈可以準時 7:30起床，8點多出門口......之後 8:30 回到學校啦！

登記後，細佬仔好開心地照老師指示入課室，玩左一陣教具，之後聽老師指示印畫，到呢刻細佬仔嘅表現都好投入，可以樂在其中，即使小茄行開一會也可以......

之後到地墊聽老師講故事，細佬仔雖然還是黐身，但也願意坐在地墊....比上次有進步喲！

聽完故事，細佬仔要準備到肌能室時，校長要求家長們行開一會，讓小朋友慢慢學習與家長分離.....小茄雖然擔心，但都要俾細佬仔試一試......

當小茄上到肌能室時，見到細佬仔有老師陪伴著，老師讚細佬仔做得好好，雖然佢有一刻想喊，但始終冇喊出來，當細佬仔見到小茄時，馬上攬著小茄......開始再黐身啦！

之後遊戲時間，細佬仔嘗試玩晒肌能室內的所有遊戲......哈哈哈哈！

玩完之後，校長再要求家長們行開一會，讓小朋友慢慢學習與家長分離，小茄跟細佬仔講：媽咪在樓下等你😘

當細佬仔到樓下見到小茄時，開始喊了！😭😭😭😭

但細佬仔拖住小茄時，細佬仔立即笑了！😁😁


今次.....有功課丫，呢個星期要整小袋仔勞作.....

**其實細佬仔係好怕人好熱情咁對住佢，好聽嘅就我行我素，但......細佬仔，要學習啦！

新生適應活動：開心樂園(一)@22Apr2017

小頌祈將於今年 9 月要開始幼稚園的學習生活，學校亦為準幼兒班同學安排了新生適應活動：開心樂園，今天是第一課.....

學校安排了細佬仔上 8:45果一段時間，但小茄今早起床時驚見已經 7:45了！立即幫細佬仔安排好早餐、換嘅衫.....可以出門了，幸好細佬仔今早非常合作，係 8:10可以出門口啦！

乘搭小巴後，8:35回到學校啦！(好在......冇遲到！😅😅)

登記後，細佬仔聽老師指示入課室，玩了一陣教具，

之後開始學習印畫，一邊印老師一邊唱

「吹丫 吹丫 吹個大波波
    吹丫 吹丫 吹個大波波
    吹丫 吹丫 吹個大波波
    小心吹破」

小茄聽到，腦海浮現了 4前前家姐韻慈適應幼稚園生活嘅情景......

印完畫，影完相之後，可以繼續玩教具了......


之後，老師集合了小朋友們在地墊上聽故事.......

聽故事後，小朋友們跟著老師上肌能室.......做完一輪熱身運動後，開始玩啦！

小茄開始發現細佬仔知道小茄在場，佢會黐住小茄.....非常留心㗎喎，但有點依賴小茄，不能放膽投入，所以小茄趁主任要求行開聽一聽備忘時，小茄留意到其實細佬仔係可以面對到嘅，但過了一會開始膽怯了！

細佬仔，慢慢黎，相信有一日你可以安心地跟媽媽say goodbye後上學的！

雖然細佬仔膽怯，但當小茄問細佬仔如果星期四再到學校，好嗎？細佬仔點點頭.......再問細佬仔下星期六好似今日咁返學，好嗎？細佬仔興奮地話：好丫！

回到家，小茄跟細佬仔傾：細佬仔，放心啦！媽咪就算點都會係學校等你的，唔駛擔心唔見媽咪㗎！如果下星期六係學校，細佬仔可唔可以試下同其他小朋友一齊聽故事、玩？細佬仔開心地話：可以！
(當然小茄聽住先啦！😏😏)


今早細佬的印畫及學校派的禮物☺️☺️

專題研習週：Light and Shadow @Day 3

專題研習週的第三天，學校安排去香港科學館，小茄自告奮勇幫手做義工家長......

當食完早餐之後，小茄跟細佬仔就搭地鐵到尖沙咀啦！

係地鐵中，細佬仔突然要求要咁樣(十指緊扣地)捉實小茄隻手....

出左地鐵之後，時間尚早，所以讓細佬仔係百週年公園入面嘅遊樂場玩一陣....


雖然係去香港科學館，但對面香港歷史博物館外嘅展品都好吸引......

繼續等老師帶著同學們來......

今日有好多學校都來參觀，目測約有起碼 5間小學，1-2間幼稚園.....

聽閒買入場券都排長龍，感謝有義工家長幫忙買入場卷.....

入場後，小茄嘅角色係維持小妮子一班嘅秩序，主要都係要仔合佢地係一個範圍，方便班主任照顧.....


偶爾見到小妮子嘅主動.......感安慰 😊😊

直到班主任集合晒成班，再上番車回學校，小茄都可以休息了

****今天細佬仔嘅表現都幾合作☺️☺️，其實如果佢唔合作嘅話，小茄就慘！慘！慘！😫😫

****小茄經過呢兩個多小時之後，覺得小妮子嘅班主任真係好犀利，對住呢廿五個小朋友仲笑到！

星期四早上的約會@6Apr2017

又到星期四啦！小頌祈又上學校玩啦！

心水清嘅可能會留意到：上星期四冇上學校，因上星期四高班嘅哥哥姐姐影畢業相，所以冇親子體操.....

今早，小茄同細佬仔如往常一樣，食過早餐後，便搭小巴上學去！

正當小茄以為細佬仔一切如常地適應環境時，細佬仔完全投入唔到，不停拉小茄走去玩、又扭抱.......

小茄心裏想：只係停左一星期，就已經變成咁.....睇黎要花多點時間幫佢，同埋之後嘅長假期要留意多一點啦！😔😔😔

義務小老師

今日係小韻慈就讀小學嘅教師發展日，所以佢有一天學校假期，而小茄亦應小妮子要求向幼稚園申請做義務小老師啦！

今早小韻慈同小頌祈食過早餐，換好衣服，乖乖地睇書，到夠鐘便出門口，搭小巴返幼稚園.....

兩個一起行斜路，
之後小妮子向老師報到後，獲安排到幼兒班課室幫手......

佢最喜歡嘅😅😅😅😅😅

好細心喲😘😘😘😘

之後小茄同細佬仔就離開啦！
***********************************************

直到上午班放學時間，小茄同細佬仔一齊到幼稚園接番小妮子，原來佢今日同幼兒班同學一齊玩，

主任准許佢同幼兒班同學一齊穿一條鏈俾細佬仔😍😍😍😍😍😍

有姐的細佬真幸福喲！😘😘😘

星期四早上的約會@23Mar2017

昨天晚上當小頌祈上床睡覺時，小茄問：頌祈，聽朝去學校玩，好嗎？
細佬仔笑笑口點頭話：好丫！

今早小茄同細佬仔食完早餐便搭小巴上學校啦！

一如既往，細佬仔一踏入學校大閘時便放開小茄的手，自己跳躍地行上斜路......

細佬仔探完額頭之後，見哥哥姐姐還未出來，便自己在操場跑來跑去......

待低班及高班哥哥姐姐出來後，細佬仔依舊企在最後一排哥哥姐姐後面，跟著扭扭身做運動......

只不過.......做到一半......開始攰了，坐係校園內嘅蒲桃樹下.....

坐了一會，細佬仔開始想扭去幼兒班的遊樂場玩，不過校工姐姐話：昨天下過雨，弄濕了，還未乾，所以不要遊玩丫！細佬仔開始有點失望，開始扭抱扭叫走.....

突然有個幼兒班姐姐入課室，細佬仔睇到後開始對幼兒班課室有興趣，雖然佢有一刻衝動想行入課室，但內斂嘅細佬仔又點會入！？只係課室門外向內望.........

再從窗外向內望.......

見到幼兒班的哥哥姐姐返回課室時，細佬仔竟然跑返去低班及高班嘅哥哥姐姐那邊，剛剛見到哥哥姐姐們在玩親子遊戲中，細佬仔主動參與扮小蝌蚪、小螞蟻、小蜜蜂......😲😲😲😲😲，真係估佢唔到！肯玩埋一份......😚😚😚😚😌😌😌😌😌

真到低班及高班嘅哥哥姐姐要返回課室，小茄同細佬仔準備走了......

但細佬仔企左係度，望住幼兒班嘅哥哥姐姐換鞋......小茄上前同細佬仔講：係丫，頌祈，返學要自己換鞋仔㗎！遲D學校有開心樂園，到時可以入課室玩㗎啦！

細佬仔只係依依不捨拖住小茄離開學校了！

細佬仔，放心啦！學校已安排了一連串嘅適應活動(http://frankiengfung.blogspot.hk/2017/03/blog-post_18.html)，希望你可以同家姐一樣開心旦旦地上學！努力丫！媽咪會陪住你適應㗎！