061213 結構性超聲波＠贊育醫院

在上一次檢查時，
已約了在贊育醫院照結構性超聲波，
雖然時間比原定的提早了一星期，
但小茄都會珍惜呢個機會了解小B更多，
而小茄發現自己記性好似差左，
所以請求老公同行，
因就算小茄唔記得問，
老公都會記得問.......

可能小B都緊張，或者係興奮啦！
所以由凌晨12點幾醒左了！

由於韻慈今早都要上學，
所以小茄如常地陪韻慈上校車，
老公竟然番過黎接小茄一起坐電車......
在東邊街下車再慢慢行上去，
感覺如拍拖一樣.....
老公比拍拖時更細心，
而且老公身體較以前好，
所以佢拖住小茄行上去時，
佢完全冇問題，
但小茄會有換唔切氣嘅表現，
睇黎小茄要更加努力，
令心肺功能更好先得啦！

感謝主！原先小茄係排第二的，
但可能早到左好多，
或其他原因，
所以小茄可以唔駛等好耐第一個照......
係等候嘅時間，
小茄擔心小B會掛住瞓，
令姑娘唔可以順利照到......
所以小茄不停地攪擾小B，
只希望佢醒來合作一點......

而幫小茄照超聲波嘅姑娘好細心地調教好張床，
之後落少少暖暖的啫喱就開始照啦！
姑娘一邊照一邊詳細地講解，
老公同小茄可以清楚地見到脊柱、大腦、小腦、眼腔、鼻孔、咀唇、心臟的四間房、腎、大脾骨、手指、腳指及性器官，
最好笑的是小茄緊張小B嘅size、胎盤位、胎水嘅問題，
姑娘細心地解答，
小B依家有13安士，屬中B，胎盤唔算低，小B個頭仲低過個胎盤，胎水唔會太多又唔會太少.....
小茄感覺wonderful！！！！:)

姑娘突然問：你地應該知道男定女？
小茄及老公不約而同地答：未丫！
姑娘話：係男仔黎.....
唔怪得小茄見到個類似奶咀的樣子係果個位啦！
呢樣小茄真係唔知.....
所以覺得好好笑，
但都有少少失望，
因平諗住如果係女，就可以接番韻慈嘅野，
依家要重新安排了！
姑娘聽到小茄話有點失望，
所以話：早知唔同你地講啦！
其實知道都好嘅，
咁所有野都可以預早安排，
而小茄都可以買冷織野了！

感謝主！呢次照超聲波真係可以令小茄很安心！
小B很合作，一切都好順利！
多謝老公陪伴，否則真係會好多野忘記問......