200214 產前檢查＠母嬰健康院

當今早小茄還在問點解要做檢查先黎凍之際，

原來天父早已預備好和暖的太陽出來，

陪著小茄返健康院檢查.......

雖然上次約了今次檢查時間係下午 3時，
但既然老公已回家照顧韻慈，
咁小茄不如早少少到健康院啦！ 

如以往情況，
今次都沒有例外，
第一次的血壓唔好，
所以要覆檢......
好在今次覆檢正常番啦！ 

到見姑娘啦......
首先姑娘緊張地問小茄：飲左糖水未？
小茄話：飲左啦！2月8日已飲(http://frankiengfung.blogspot.hk/2014/02/080214.html)
姑娘再問：有冇收到電話？醫院有冇俾期？
小茄答：冇......
姑娘清楚地話：咁隔左兩星期，冇收到電話，咁安全啦！下次都係返黎健康院檢查，
小茄其實都知冇收到電話即等如血糖正常冇超標，
但其實小茄今次係緊張另一樣野：
因韻慈詐糊果次抽血結果話小茄血紅素比正常低左少少［缺鐵性貧血］，
雖然小茄都知係咩原因，
但醫生處方了鐵丸俾小茄，
食了一星期就出現負作用，
所以小茄今次擔心同一情況又再出現.......
但姑娘再三地話：如果有問題，就會收到醫院電話，既然收唔到就唔駛擔心啦！

之後繼續檢查，
姑娘幫小茄摸肚度肚，
摸到小B的頭已向下，
雖然都會話有機會會轉番上黎，
但小B的頭已頂岩位同頂實了！
度肚就話正常長度，幾好！
(點解佢好似咁滿意咁呢？
但佢度時小茄會覺得痛)
姑娘解釋因小B頂住恥骨......
再聽小B心跳，
姑娘讚小B心跳好穩定，
而且好強......
之後再睇番上次記錄：
血壓非常正常，
體重雖然只比上次重了 1磅，
但姑娘話會觀察幾次，
所以冇話小茄......

由於下次都係返健康院檢查，
所以直接約兩星期後再檢查，
到時再摸小B的頭位去到邊.......

小B，請你多留幾星期吧！