無聊地變髮

以往小茄多數為小韻慈變髮，但當佢升小學後，冇之前咁多時間了.....

所以.....幫自己攪攪新意啦！

登登登登！



清楚少少.....

其實好簡單....先把上半部分嘅頭髮紥起，
係中間拉鬆少少，
把下半部分頭髮從下向上經中間拉鬆了嘅位置.....之後放好！

攪掂！

去超級市場玩車車

昨天提到小茄很喜歡帶小朋友到超級市場(http://frankiengfung.blogspot.hk/2017/03/blog-post_7.html)，而細佬仔最喜歡拉小茄到西寶城內嘅惠康逛逛，原因其實好簡單，因為細佬仔自小便喜歡車車，而呢間惠康有車車手推車.......

你睇佢幾開心.....

全程不停呠呠......呠呠.....呠呠.....呠呠.....呠呠.....呠呠.....

但呢間車比普通手推車重，所以要用多少少力推，而且車身較長，所以轉彎時要預留多少少位轉.....

XX媽媽.....

自從小韻慈入幼稚園後，小茄便多了一個稱呼：韻慈媽媽！
由果時開始，每當小茄去到學校，或時接送小韻慈校車時，都會有其他同學仔(不論比韻慈大或小)走來跟小茄說：韻慈媽媽，早晨！

今早，當小茄跟細佬仔行街時，突然聽到這個好親切嘅稱呼，
小茄回頭一望，見到有著住校服嘅小朋友向著小茄揮手👋🏻👋🏻👋🏻，其實小茄認到校服，但認唔到小朋友名字😔😔對唔住丫！🙏🏻🙏🏻

再行多幾步....適見幼稚園校車，校車有過半的小朋友向著小茄揮手👋🏻👋🏻👋🏻，小茄只好向校車內的小朋友揮手👋🏻👋🏻👋🏻......

之後，小茄在想：小朋友的記性真好！小韻慈已畢業大半年時間，但學校嘅師弟師妹還記得佢...小韻慈人緣都算幾好丫！(自我安慰中😅😅😅😅)

接下來小頌祈準備入幼稚園，校長、老師們及書記努力地改口叫小茄做頌祈媽媽，當然如果有關小韻慈嘅事，都會叫番小茄做韻慈媽媽！☺️☺️

手搓麵包 07Mar17

過去兩年多，其中一樣野小茄係冇變過，就係依然會自己做麵包俾孖寶食......

但係呢段時間小茄曾被「朋友」話過：其實駛乜咁辛苦？出去買咪得囉！味道咪又係差唔多......仲要攪到對仔女咁咀刁，自己搵黎攪！

買回來的確方便，但知唔知坊間嘅麵包點整出黎？加左幾多唔需要嘅野？坊間嘅甜度真係適合自己？材料來源自邊度？

這就是小茄到依家還堅持的原因，但相信呢位「朋友」應該到呢刻都唔會明㗎啦！

講番整麵包......

材料：
高筋粉 300g
酵母 5g
砂糖 20g(按口味加多減少)
鹽 5g
油 20g(我用橄欖油)
暖水 200g做法：
用部份暖水把酵母溶
把高筋粉、鹽、糖撈勻，加入酵母溶液攪勻，加入暖水搓至起筋膜，加入油搓至油全滲入粉糰中

以室溫進行一發，約2-3小時，當粉糰發至原來的2-3倍
取出排氣鬆馳約20分鐘後造型
利入沒有開的焗爐進行二發，放一碗熱水在粉糰旁，約50分鐘至 1小時，粉糰發至容器8成高取出
預熱焗爐，用170度焗30分鐘，通常我會用錫紙蓋頂，因怕燶面，焗完30分鐘會試粉糰是否已全熟，如未熟就再加時，如已熟透則加焗5-10分鐘(不用錫紙蓋頂，好讓麵包上色)
取出離模待涼切片

小頌祈的要求

雖然依家小頌祈已經兩歲幾就快三歲，
但小茄沒有讓佢上學前班 (PN)，
因小茄覺得PN唔係必需入讀嘅，
而且由幼稚園幼兒班 (K1)開始，
便有起碼十五年(3年幼稚園＋6年小學＋6年中學，已未計大學)嘅讀書生涯等緊佢，
點解唔俾佢玩多一年呢？

所以每朝當家姐上校車後，
小茄都會應細佬仔要求周圍行，
今早就去公園玩.......
其實公園設施既可以玩，


亦可以學到好多野㗎......

仲可以學習同其他小朋友玩，同公園嘅婆婆交談，同公園嘅伯伯一齊做運動.....

之後，細佬仔仲要求行到去石塘咀一田，
其實小茄很喜歡係早上帶小朋友去超級市場，
因比較少人，職員比較輕鬆，
會同小朋友玩，
而且小朋友又可以有D時間認識不同嘅事物....

今早細佬仔係一田一邊推貓貓車，一邊跳......不停話：貓貓Kitty有包包、菜菜、魚魚、肉肉、糖糖但會咳咳嘅，學左蠔......

哈哈哈哈！幾開心！

海皇粥店 Vs (正宗)卓記

早前聽電台主持介紹話海皇粥店依家有早餐都好似幾抵咁，

小茄見屋企附近開左間，所以昨天決定一試......
豬血艇仔粥＋炒米......好似$32 (有點貴喲)
另買一碟腸粉走豉油俾細佬仔，都唔平㗎！好似超過十蚊㗎！🤑🤑🤑

食落.....中伏！
碗粥好似好大個碗，但個碗唔深，所以其實碗粥唔算大，只係勝在夠熱，不過......個炒米就......唔係好掂！冇香味.....冇味！連D菜都冇味......小茄心諗：點解個炒米可以攪到咁㗎呢？
小茄唯有勁加芝麻，希望又份香味.....食埋佢啦！😤😤
細佬仔食齋腸都食到皺晒眉頭.....唉！😩
食完一出門口......口渴到爆！應該都落左唔少味精喲！😫😫😫😫

今朝細佬仔話想食腸粉，但唔去尋日果間，要去街市食.....
所以今早上左士美菲路熟食中心 (正宗)卓記，
小茄特登叫番同一樣嘅野 (豬血艇仔粥＋炒米)，(正宗)卓記收 $14+$6，小茄再買一碟腸粉走豉油俾細佬仔 ($6)，加加埋埋都只係$26，平海皇粥店差唔多一半丫！

聞落去.....好香！有少少鑊氣，椰菜有甜味㗎！
而碗粥都熱㗎，仲好多豬紅添.....
細佬仔對碟齋腸好滿意，不停地食.....仲比小茄食得更快添！
食完冇太大嘅口渴感.....

講真......小茄知道除非自己煲嘅粥啦，否則外出食粥實會有味精，但落還落，唔好太誇張，話晒味精都唔係好野黎㗎嘛！！


(正宗)卓記餐牌   一

(正宗)卓記餐牌   二

吾家孖寶互相配合

自小頌祈出世後，由於韻慈同頌祈嘅野真係好似，所以小茄幫佢地改花名叫「孖寶」！

自從韻慈升小之後，頌祈嘅時間表又自動地改變......

其實係小茄有心希望家姐放學返黎做功課時，不受細佬影響......

做法其實好簡單

只要係家姐放學返黎之前，收晒細佬仔嘅電.....😏😏

咁家姐做功課時，細佬仔就會玩玩下都會瞓著.....🤣🤣🤣🤣

只不過佢瞓左係地下，

小茄就要抱番佢上sofa.....

唔好打地氣丫嘛！

小茄回來啦！

久違了呢個blog啦！

岩岩想開黎睇嘅時候，發現所有password唔記得晒！
結果.......咪就係要做小茄覺得最煩嘅一件事，reset過晒囉！😓😓

開番之後，發現對上發表嘅blog已經係 2014年 8 月，冇錯！係兩年半前丫！當時係小頌祈剛剛出世冇耐......因為要照顧兩個小朋友都幾攰，所以呢兩年半停左打字......對唔住丫！🙏🏻🙏🏻小茄真係懶丫！

但鬼主意多多嘅小茄，又點會停止分享丫......

係呢段時間，小茄先後利用Facebook page去繼續分享，包括家常事、手作仔嘅《自作業》(https://www.facebook.com/frankiediy/)及關於編織嘅 "Vega by Frankie" (https://www.facebook.com/vegabyfrankie/)


https://www.facebook.com/frankiediy/


https://www.facebook.com/vegabyfrankie/

除了Facebook page 外，小茄還利用Pinterest、


Instagram，


還有 Tumblr、Twitter，等等.....

但黎緊小頌祈準備讀幼稚園K1 ，小茄開始多番少少時間，可以繼續分享我地嘅日常事！

小茄都希望會分享番：
小韻慈幼稚園畢業、
小韻慈升小嘅過山車遊戲、
小韻慈升小嘅適應、
小頌祈由全母乳慢慢引入副食品、
小茄對小頌祈唔喜歡食嘅對策、
小頌祈嘅幼稚園面試遊戲、
小頌祈嘅幼稚園適應.......

仲有D咩呢？
有冇咩你地想知？話我知.....OK？

產後脫髮

自7月前小茄開始產後脫髮，

雖然本來頭髮算多，

也明白脫髮是因荷爾蒙所致，

但當每次洗髮時，

眼見脫下來頭髮的數量，

以及這個樣子

怎能叫自己不害怕呢？

但小茄相信一定可以回復正常的，
只不過不知還要等多久呢？

節瓜煲豬骨

夏天瓜果當造，

所以還是煲番些瓜湯......

今次簡簡單單將節瓜加豬骨煲番啖湯啦！

再加少許南北杏，
當然會加少少薑啦！

紅豆糕

韻慈經常問小茄何時整野食......

整咩好呢？

不如試整中式糕點丫，

係眾多中式糕點之中，

小茄最有記憶係小時候家母所整的紅豆糕，

不知是紅豆營養價值高，

還是她愛吃紅豆，

所以間中她也會整紅豆糕.......

由於小茄第一次學整，

所以分量整少少試下先.....

材料：

紅豆.......100克

糖......... 75克

粘米粉.... 50克

澄麵粉.... 25克

粟粉....... 25克

油.......... 25克

水(凍開水) 300克(煮紅豆用)

水(凍開水) 100克(開粉漿用)

做法：

先把紅豆浸泡起碼浸一小時，

小茄昨晚臨睡前開始浸.....

(浸泡過的紅豆比較容易軟身)

把紅豆瀝乾，
用煮紅豆的水把紅豆煮至軟身..... 

同時把粘米粉、澄麵粉、粟粉、糖及油用開粉漿的水開勻......

加入煮好的紅豆內，
用中火煮至滾......
(記得一邊煮要一邊攪拌，
最好別黐底.....)

把已煮好的粉漿放入糕盆內..... 

大火隔水蒸一小時...... 

之後......
待涼便可以放入雪櫃...... 

冷卻後可以食啦！