坐月中

由於小B－頌祈已於4月21日出世，
小茄現在要做坐月子啦！
有關有驚無險的生產，
住院幾天，
及坐月呢段時間所發生的事情......
小茄會在精神許可時，
間中補打番記錄......

五更飯

如果問長輩坐月期間食咩最好？

很多長輩都會話食五更飯，

可以令身體及體能恢復得快一點好一點......

但五更飯......談何容易呢？

韻慈時有亡母替小茄預備五更飯，

今有老公替小茄預備......

引述老公做法：(https://www.facebook.com/photo.php?fbid=10203624989882356&set=t.735001199&type=1&theater)
材料：雞肉（無激素雞肉），隔夜飯，黄薑，有機波菜。煮法：切絲，糖，生抽，生粉各少許，醃約十分鐘又加入黑麻油少許略炒備用。炒鬆隔夜飯，黃薑可於鑊面磨蓉（較多），中火炒至有薑香味，雞肉回鑊，炒至飯見乾身，加入波菜略炒（因為上碟後仍有餘温，故不用炒至全熟，）。完成。

每朝見到這碗飯，
小茄頓時覺得很幸福！
老公，多謝你！

WebRep

currentVote

noRating

noWeight

終於出得院啦！

由於入院時抽血發現有輕微妊娠毒血症(http://frankiengfung.blogspot.hk/2014/04/blog-post_21.html)，

所以唔出得院(http://frankiengfung.blogspot.hk/2014/04/blog-post_23.html)，

醫生早上檢查時話驗血報告出了，

雖然指數回落，

但未算正常水平，

小茄緊張地問：可以出院嗎？

醫生反問：你想出院？

小茄即答：緊係啦！我想返屋企，見我個女，我好掛住佢丫！

醫生了解後話：好啦！但要覆診，覆診前要抽血，睇下指數是否繼續跌至正常水平，另外係屋企要繼續量血壓......

感謝主！終於可以出院了！

老公跟韻慈來醫院接出院，

當小茄見到韻慈(不是隔著電話)時，

小茄開心到差點喊出來，

自韻慈出世後，

未試過咁耐時間見唔到呢個女，

好想抱佢，

但揹著小B......抱唔到！

眼見呢個女在幾日間長大了不少......

回到家，

韻慈見到小B睡在餐椅上，

表現得很開心！

她的小B回家了！

韻慈開心了一會兒便問：點解小B瞓呢度？佢唔係同我瞓咩？

小茄解釋完，

韻慈只好扁咀地離開房間，

讓小B休息......

唔出得院！ :(

自再踏上母乳媽媽之路(http://frankiengfung.blogspot.hk/2014/04/blog-post_1135.html)後，

小茄很努力地每三小時餵一次奶，

希望小B可以維續夠濕片片有便便，

就算收水都唔好輕太多，

黃疸指數唔好太高，

可以順利地出院......

到生完第三日，

正當小茄準備可以出院時，

(因韻慈時順產正常觀察最少48小時就可以出院)

醫生檢查後話水腫未退到，

血壓偏高，

入院時驗果次血(http://frankiengfung.blogspot.hk/2014/04/blog-post_21.html)發現肝酵指數較高，

有輕微妊娠毒血症，

所以血壓一直偏高，

會再抽血檢驗，

睇下指數會否下落.......

終於明白點解入院血壓會上到158，

原來不單只係因為痛而令血壓高，

而係真係有問題！

小茄認知妊娠毒血症會死.....

再想起家中的韻慈，

又望著剛出世的小B，

開始擔心萬一自己離開，

佢地兩個會點呢？

老公對住佢地兩個點算呢？

一邊想，眼淚隨隨落下.....

情緒稍微平伏，

收到韻慈的電話，

當小茄聽到韻慈的聲音時，

眼淚再次落下，

(真係好掛住佢，

未試過咁耐冇見過佢抱、過佢了！)

但小茄忍著淚扮冇事繼續跟韻慈傾電話，

直到韻慈問：媽咪，點解仲係醫院，唔出得院嘅？

小茄只回答：因為媽咪身體差，有問題，所以唔可以出院

講完後，已經忍唔住喊，不能再扮了！

韻慈聽到也即時喊.....

老公只好安慰地說：有醫生睇住，冇事嘅！加上轉左入二等病房(http://frankiengfung.blogspot.hk/2014/04/blog-post_5974.html)總比普通病房好，好好休息下......

收線後，

小茄再想：

開心又要過，

唔開心都要過，

橫掂都要住多日，

不如努力好照顧小B，

另外自己放鬆心情，

可能指數會跌番，

咁咪可以出院囉！

接近中午，

小B要見兒科醫生，

當醫生幫小B度黃疸指數後話有少少高，

需要照一日燈，

小茄心想：冇請謂啦！橫掂自己都要住多一日......

但有護士入來聽到小B要照燈時，

立即跟醫生傾番小B出世時數，

再翻查參考資料，

原來有少少誤會，

小B黃疸指數還屬正常偏理想......

(小茄聽後安樂了！)

之後檢查小B的反應，

當然會喊啦！

(之後發現小B被嚇到瀨尿！)

下午，有位護士突然有個請求：

希望小茄可以泵出母乳讓她可以用不同的方法餵小B，

(其實又冇咩所謂，

又可以學多點事......

幾好丫！)

所以小茄泵定母乳讓護士可以示範......

係過程之中，
護士話小B好緊張，
由於之前係埋身餵哺，
所以就算佢咀仔細，
都肯張開個口食奶，
但就會出現有咀角漏出嘅現象......
小B竟然可以食晒預備的45mL母乳！

小茄另外發現如果抱著小B埋身餵哺時，
血壓會偏高，
但如果量血壓時不是在抱小B，
血壓會比較正常一點，
而且在跟護士傾談中，
如果休息不足，
血壓都有可能會升高，
咁......小茄唯有把半夜的奶餐假手於護士......
估不到埋身餵哺完3小時，
泵晒兩邊乳房可以有85mL，

雖然小B只可以在埋身完4小時食到75mL，
但.....小茄休息完真的好一點，
希望血壓可以回復正常啦！

在二等病房的日子

當小頌祈食完奶(http://frankiengfung.blogspot.hk/2014/04/blog-post_1135.html)不久，

姐姐過來通知小茄二等病房有位了，

希望小茄可以收拾好物品，

待果邊執完床就可以轉過去，

另外選埋晚餐及第二日的餐單.......

小茄亦通知老公需要轉床，

原來老公擔心小茄在普通病房會休息得唔好，

會影響上奶及出奶，

所以煲了黃豆豬手湯及會煮定飯，

方便小茄可以在第二朝清早食用......

(老公，真係好細心喲！)

在二等病房，
空間比普通病房大，
可能只係兩位病人共用一間病房，
所以比普通病房靜，
雖然沒有海景，
但沒有西斜，
小B可以好好睡覺，
小茄也可以小睡片刻........

小茄便開始了三小時餵一次奶，
小B瞓小茄又瞓，
鬧鐘響就準備餵奶，
由於開始谷，
小茄知道谷到實，
小B沒可能夠力啜的，
護士教每次餵奶前會用熱毛巾，
按一按鬆，
讓阿B可以啜到，
另外小茄會在小B啜奶時，
一隻手托住小B，
另一隻手推鬆乳房，
令母乳出得好一點......
慢慢見到小B有足夠的濕片，
而且有較稀的便便，
(有點似芝麻糊，
所以小茄唔再食芝麻糊了！
哈哈哈哈！)
護士解說：
有尿即食到前奶，
有足夠水份，
有便即食到後奶，
就可以增到磅了！

小B，努力丫！

再次踏上母乳媽媽之路

小茄生完小B之後，
助產士已通知小茄暫時未有私家床位(http://frankiengfung.blogspot.hk/2014/04/blog-post_21.html)，
所以當小茄離開產房後被推到普通病房......

由於韻慈不能進入病房或產房，
所以老公需要照顧韻慈而沒有陪產
(其實小茄自知如果老公係產房可能會冇勇氣去面對生產痛楚)，
而且小B出世係半夜，
唔知生產時間有幾長，
還是去韻慈回家睡覺，
所以老公跟韻慈沒有在醫院留守......

由於小茄入院行李還在產前病房，
要老公幫手把行李從產前病房攞去產後病房.....
(冇計啦！都係保障番遮！)
其實都冇咩所謂，
因為小B出世後，
小茄需要滴子宮收縮藥水，
係滴完之前都唔可以落床，
還好的事被安排在窗邊望海的床位，
小茄可以往窗外望.....

休息了一會，
小茄在想：
不論出院後是埋身餵哺還是泵出來餵，
首要都是要令乳腺通順及上到奶.....
小茄決定㩒鐘請護士幫助抱小B嘗試埋身餵哺，
因為小茄已經錯失了生產後立即餵哺嘅時機，
怕再拖落去乳腺未通，
會影響上奶及出奶.......
所以小茄要爭取時間，爭取機會，
再次挑戰餵哺母乳.......

小B第一次埋身，
護士話佢咀較細，
所以要有耐性引佢張開口，
佢個口要大到可以吸到乳暈才算正確，
如果只吸啜乳頭，
雖然容易，但乳頭會容易整損，
所以當見到佢變得懶惰，
便要他重新張開口，
用番正確方法吸啜才可.....
(雖然韻慈小時候也是食母乳的，
但韻慈時不能埋身餵哺)
護士細心在旁講解，
糾正小B的錯誤，
雖然認知上，
小茄知道小B應該啜不到甚麼，
但感覺上，
小茄似慢慢感到乳腺被啜通......

小B，努力丫！

可惜當小B發現滴藥水的喉時，
便開始唔再專心，
不停地郁到條喉，
令小茄手背種豆位痛.......
冇計啦！
要是小B唔專心掛住玩條喉，
倒不如下次再試啦！

護士再回小茄床邊了解埋身餵哺情況，
小茄只好跟護士說小B玩條喉這個問題，
護士立即安慰：唔緊要！陣間再試，其實都試左40分鐘，算唔錯了......待滴完藥水，條喉就可以拆除，唔駛擔心！而且BB剛剛出世，體內還有儲備的，唔駛擔心會餓親.....維持兩至三小時俾BB食一次就可以......
護士並勸小茄好好休息一下，
之後便幫小茄把小B放回嬰兒床了！

天還未亮，
但小茄瞓唔著，
可能剛才由見紅到小B出世來得太快，
小茄像消化不良，
需花點時間重組一遍，
而且在小茄換唔到氣之際，
小茄再聽到的聲音，
很親切、很溫暖、很熟識，
肯定唔係助產士們，
但究竟係邊個呢？

在小茄慢慢重組完一遍後，
小茄開始累了，
坐著都可以睡著，
當小茄睡醒時，
天亮了，
準備食早餐，
小茄望一望支藥水，
點解滴得咁慢嘅？

護士來視察滴藥情況都發現慢左少少，
所以再調節速度，
而且剛剛相隔了三小時，
又係時候俾小B練習啦！
今次小B開始識啜了，
但佢還是很想懶惰，
不停要糾正......
經過60分鐘後，
頂唔順，
小茄開始手攰了！
只希望小B下餐可以乖一點啦！

放低小B後，
便聽到老公跟韻慈的聲音，
他們幫小茄把入院物品從產前病房攞落黎產後病房，
其實由於韻慈年紀小不能入病房，
但又沒有人可以照顧韻慈，
唯有再次一齊進入病5房啦！
老公為了不想大家難做，
所以幫小B影了相便走了！

小茄由於還滴藥中，
未能可以落床，
所以不能處理物品，
只係拿出手機為小B影相，
另外還想方法可以令小B啜得好一點及自己可以快一點上奶......

到差唔多夠鐘，
再跟小B試一試實踐那些方法，
可惜還未上到奶......
小茄心想：可能生完之後未飲水，所以唔理想，待拆豆後第一時間要補充水份.....

好不容易終於滴完兩包藥水，
護士安排姐姐陪同小茄上洗手間，
(為了安全，
生完第一次落床上洗手間一定需要有人陪同，
怕媽媽暈低......)
當小茄回床後，
立即在袋中拿出保暖壺及炒米茶包(http://frankiengfung.blogspot.hk/2014/03/blog-post_7164.html)，
焗炒米茶來補充水份及希望體力可以快回恢復......

不久，
夠鐘食午餐，
小茄望一望碗湯，
有花生......增奶湯！？

小茄向姐姐查詢， 
原來醫院提供的午餐及晚餐內的湯水都係增加乳汁湯水......
(太好啦！)
另外姐姐還俾了一張關於增加乳汁湯水小冊子，

食完午飯，休息一下......
又係時候再俾小B試下埋身，
今次冇左滴藥條喉，
小B可以專心啦！
小茄不停提醒小B要張開口，亦當小B想懶惰，
嘴仔沒有吸啜乳暈時，
小茄只好輕輕令小B輕開口，
再用正確姿勢吸啜，
當小B吸啜時，
小茄覺得乳房開始有少少漲，
有種似曾相識的感覺，
當小茄見小B自行輕開口會展現笑容，
小茄開始猶疑：
究竟小B啜唔啜到野呢？
究竟係唔係已經上到奶呢？

在幫小B換完片後，
小茄自行檢查乳房......
真係有黃色的初乳出丫！

感謝主！
小B真係啜到奶 :D
小茄開始放心了，
因小茄知道乳汁出到即乳腺已經開始通了，
而且又上到奶，
只要小茄跟小B再努力一點，
小B就可以全人奶，
唔駛補奶啦！
感謝主！
預備了最美好的俾小B :)

求主繼續保守就算小B要收水，
但體重都唔好跌太多，
因唔想再經歷韻慈家姐時的問題，
女兒真的唔想再令自己咁大壓力......

WebRep

currentVote

noRating

noWeight

真驚險！

雖然小茄每日都很努力地行，

但小B好像還未想出來......
由於上次返醫院檢查醫生已經話下次檢查需約催生期(http://frankiengfung.blogspot.hk/2014/04/120414.html)，
所以小茄已經打定輸數小B可能真係需要才肯出世，

但小茄在想：
在贊育醫院照完結構性超聲波後，
小茄都沒有再為小B照超聲波，
再加上自己體重增長唔多，
所以開始擔心：
究竟小B生長如何呢？
究竟小B吸收又如何呢？
究竟小B有冇足夠磅數唔駛瞓箱？

突然又想：
小B遲遲都唔出世，
會否太大？
還可以順產嗎？

晚上，這些問題不停在小茄腦海中出現，
再加上小茄運動量多了，
所以小茄更容易覺得累，
雖然宮縮似有規律，
但相隔 20分鐘一次，
而且又未見紅未穿水，
所以小茄決定跟老公傾一陣計後便瞓豬豬......

正當小茄睡前上洗手間時發現......
咦！點解有少少紅？
小茄最初覺得自己可能眼花，
再飲多杯水，再上多次洗手間，
血多了少少，都係鮮紅色的......見紅丫！

小茄立刻叫醒老公，
可能小茄開始緊張，
所以宮縮時間縮短了，
頓時由 20分鐘一次變成 7分鐘一次......
老公見小茄行都開始有困難，
再加上半夜時分，
所以決定叫救護車......

在等待救護車時，
老公叫醒韻慈，
而小茄感覺得宮縮時間再次縮短，
變成 7分鐘兩次......
小茄連鞋襪都需要老公代勞.......
(真冇用！ >.< )

小茄只好默禱，
求主保守整個過程、小B健康.....

不久，
警察來到，
救護員也到......

由於冇人照顧韻慈，
所以警察及救護員批准韻慈可以跟車......
(今次係韻慈第二次坐救護車，
而第一次......咪就係佢出世果朝囉！)

在救護車上，
救護員幫小茄量血壓知道偏高，
但小茄因陣痛已經冇理太多，
到達瑪麗醫院時，
先到急症室作初步檢查，
確認真係見血，
立即推上產前病房......

到達產前病房，
由於護士擔心小茄急產，
所以再檢查子宮頸嘅情況，
還好......子宮頸成熟，
睇黎小B真係出世啦！
小茄心裏跟小B說：努力！好快就出世啦！

之後換病人衫，
再量血壓......
上壓158！？
(唔係卦！)
但小茄已經痛到完全冇心情理會 >.<

老公幫小茄辦理入院手續後，
由於已經夜深，
而韻慈不能長留在病房，
不如先行回家.....
待小茄入產房及小B出世後再打電話俾佢啦！
(一直小茄都冇諗住老公陪產，
因小茄想老公可以照顧韻慈，
咁小茄就已經安心！
再加上如果老公係產房，
可能小茄唔會有勇氣生產......)

開始駁機啦......
不久有醫生來解釋現時情況，
起碼要觀察一晚，
如果痛得再密或穿水，
就會入產房
如果維持現狀或痛得少左，
就會出院，
之後佢要求種豆及抽血，
話作驗血及配血之用......

在等待期間，
雖然小茄唔知顯示嘅數字代表甚麼，
但小茄見當冇痛時，數字係1X，
當痛時，數字很快就上到9X.....

突然，小茄有上洗手間的感覺所以叫護士，
護士過來檢查，
原來穿水！
(小茄完全唔知發生咩事，
因韻慈出世時小茄聞氣聞到瞓了，
只知穿水係突然有大量水湧出......
原來穿水嘅感覺就好似想去小便但又忍唔到)
但護士發現胎水唔清，
似有些胎糞，
所以立即找醫生，
小茄這刻問護士：係咪真係生得？
護士話：緊係啦！你唔係想唔生？
小茄立即答：唔係，只係怕食詐糊，要出院.....
護士話：依家連水都穿埋，就算你想出院都唔俾出住，生埋先同阿B出院啦！

醫生檢查見已經開了兩度幾，
再加上胎水有胎糞，
便跟護士準備幫小茄換衫入對面產房......

入到產房，
依然駁住機，
小茄要求聞氣，
因小茄其實好怕痛，
同埋怕自己緊張會令身體出問題......

小茄一直繼續默禱，
求主保守整個過程，
在產房裏，
好在有位助產士陪住小茄，
當唔痛時，
可以陪住小茄傾計，
但當痛時，
小茄就聞氣.
直到助產士突然話小茄好忍得痛.......
小茄開始發現痛到已經不能再傾到計，
而且聞氣不能令小茄入睡，
小茄聽到助產士們所講進入瘋癲狀態，
可能真係太痛，
小茄不停地郁，
但小B還未落到，
最後小茄感覺到有助產士幫小茄掃背舒緩痛楚，
讓小B的頭可以慢慢落......

突然小茄發現自己換唔到氣，
(吓！又黎！連呼吸都亂......)
但小茄聽到一把聲音：慢慢黎，唔好緊張，聽住助產士點講......
不久，
助產士拍一拍小茄，
叫小茄一急就要屙啦！
小茄感覺到宮縮但一用力時就覺得好痛.....
助產士話因唔係第一胎，
唔會剪會陰，
所以要靠自己出力屙.......
到小茄再感覺到宮縮，
用力！
小B出世了！

當小B出世果刻，
跟韻慈不一樣，
小茄聽唔到喊聲，
助產士們急忙地幫小B抽走氣道內的胎水，
不久，
小茄聽到小B的喊聲了！
與此同時，
小茄要排出胎盤，
但一點都唔容易，
要再痛多一痛.....
胎盤排出了！
還有排出胎毛.....
時間比韻慈時耐！！
(因韻慈時唔駛排出胎毛，
同埋排胎盤都唔痛......)
照顧小B的助產士報告小B重量時，
小茄完全唔敢相信自己雙耳，
近 4！
咪重過家姐！
有冇攪錯到！？
(小茄心裏計：超過 8磅，但自己只重 11磅半，咁小B咪抽走唔少野！？)
處理小茄的助產士突然跟小茄講：
有少少撕裂，但傷口唔大，
所以唔聯針啦！
睇下傷口可唔可以自己復原啦！
小茄聽後只回應：哦！咁係唔係攪掂？
助產士答：攪掂！休息下啦！
另外有助產士抱著小B過來問：駛唔駛抱下阿B？
小茄還未來得切反應，
有助產士已經幫手答：唔好啦！剛剛咁瘋癲，俾媽媽休息下先.......

在所有助產士離開產房，
有姐姐入產房清潔時，
小茄感覺到很寒冷，
凍到整個人發震的......
可能產房冷氣大，
或是小茄體內突然冇左小B這個小火爐，
所以要求加被......

休息了一會兒，
小茄在產房門外等小B一同到產後病房....
助產士跟小茄說：
雖然要求入住二等房，
但暫時未有床位，
所以先到普通房先......
當小B返回身邊，
小茄頓覺得溫暖 :)

小茄事後睇番時間，
由在產前病房辦入院手續到小B出世，
頭尾都係用左 3小時多幾分鐘！

感謝主！
祂沒有話過生產唔痛，
但感謝主清楚女兒怕痛，
所以生小B唔駛痛咁耐！

WebRep

currentVote

noRating

noWeight

轉眼已經兩年了！

在兩年前的今日(2012年4月20日)，
家母離開我們，
返回天家！

上年當踏入4月時，
家母在醫院及離世的情景，
以及家母生前的點滴就會不停浮現在小茄腦海之中，
小茄的眼淚便不受控地流下.......

今年可能懷孕關係，
雖然情景同樣會浮現，
但小茄為怕自己的情緒大起大跌，
所以盡量控制自己的眼淚，
甚至寄情於其他事情上，
總之就令自己有咁忙得咁忙，
沒有時間再去想.......

直到家母離世當刻，
小茄不能再扮，
只好靜下來.......靜靜的默想......

媽咪，
話咁快你走左兩年啦！
你依家生活如何？
或許你依舊唔放心，
還在擔心我們，
但你現在已經不需再受肉身痛楚的折磨了！
今年我不能到墳前探你，
因肚中有你的細外孫，
所以唔方便......
遲下待小B出世長大一點時再帶他來探你......
你放心啦！
我會努力照顧好自己，
倚靠主去教養你的一對外孫......
唔駛太擔心我啦！

待產的日子

由 4月16日開始，
韻慈的復活節假期開始了！
為免老公擔心，
而且小茄怕跟韻慈出街時作動，
所以只好留在家......

到了 4月18日－前日，
復活節的公眾假期開始了！
老公不用上班，
佢可以照顧韻慈，
咁小茄便可以放心了！

但由於在產檢(http://frankiengfung.blogspot.hk/2014/04/120414.html)時，
醫生曾提及到可能今次生產的時間會比韻慈時短，
而且可能冇咁痛，
老公擔心小茄外出時作動都唔知道，
所以小茄外出時間縮短，
雖然小茄多了時間留在家，
但小茄又怎會乖乖等待呢？

由於家母曾話過行多點，
擺鬆盤骨，
就會生得快一點，
所以.......

前日......
小茄在家來回行了 4小時，
昨天......
再行了4小時，
今天......
小茄行了近 4小時！
小茄來回行，
韻慈又陪伴著來回跑 :)

當前日行了4小時後，
小茄覺得肚子再落低了......
當昨天行了4小時後，
小茄開始感覺得宮縮開始有規律了，
約 30分鐘一次......
但完全唔覺得痛，
只覺得整個肚實晒！
而今天行完之後，
宮縮時間縮短至 20分鐘一次......
但都真係唔覺得痛.....
宮縮時間開始縮短了，
小茄開始忐忑地問：小B真係要今天(4月20日)出世嗎？

雖然小茄萬般唔想，
但如果天父真的要這樣安排，
小茄只好接受......

自家製薑醋 (十二)

浸了約六星期(http://frankiengfung.blogspot.hk/2014/03/blog-post_4042.html)了！

係時候要把它們放入雪櫃，

到生完之後食之前再處理了！

原先諗住呢個步驟可能要請老公幫忙處理，

估唔到小B還未肯出世，

小茄可以自己處理啦！

把它們放入雪櫃，

安心晒！