感謝主！
終於冇雷暴警告，
天色幾好！
因懷孕後期需每星期檢查一次，
由於上次檢查時血壓再一次踩界，
但回家後血壓正常，
為免今次返醫院血壓又再一次踩界，
醫生誤會小茄真係血壓高，
所以小茄每日都乖乖在家量血壓，
今早臨出門再量一次......
(正常的！)
(正常的！)
特別係今次陀小B，
照計時間充裕，
一點都沒趕時間.....
每次都係 8:50左右到！
之後慢慢攪手續及磅重，
呢個星期小茄重了1 kg！
(頓時超開心！好滿足！)
之後量血壓......
第一次量：14X/9X
(又咁高嘅！
雖然可以覆檢，
但究竟發生咩事？)
覆檢：13X/7X
(雖然係回落，
但又踩界，
會唔會俾醫生寫紙入院？
小茄真係唔想喎！
又要老公請假照顧韻慈，
同埋小茄自己知道係醫院會覺加瞓唔到！)
小茄開始真係驚！
約等了半小時左右，
小茄要見醫生啦！
醫生見到小茄已經說：今次血壓都有少少踩界......
小茄答：係丫！但唔知點解丫？
小茄唯有俾番過去量血壓的相俾醫生睇及再解釋：係屋企真係好正常的！
醫生睇完相後說：唔駛擔心！我唔會捉你入院，其實可能你返醫院會覺得緊張，所以血壓會高少少，而呢種情況健康院又唔知如何處理好，只會要求你再上黎醫院檢查，而依家每星期要檢查一次，為免你兩邊走，所以下次都係返黎檢查啦！
(小茄聽到醫生話唔會捉入院已經安心了！
其實小茄返醫院檢查係會較方便，
但就真係擔心每次醫院檢查血壓都會偏高......)
到摸頭仔、度肚及聽小B心跳：
當醫生見到小茄個肚時，即說：個肚大左D.....
小茄專心留意醫生度肚底位，
所以小茄已經忘記問醫生小B頭仔落到邊......
但醫生度完肚後已說：如果見有少少作動嘅感覺就要準備入院，唔好拖了！因已經唔係第一胎，所以會比上次快......怕你係屋企或未到醫院就生左了！寧願係詐糊，檢查完回家，好過趕唔切啦！
之後醫生再解釋血壓問題：
其實咁踩界主要係擔心會有妊娠高血壓，
但如果真係有嘅話唔係上胎而今胎出現，
同埋唔會只係返醫院先會血壓高，
醫生再查詢小茄家族史，
及反問小茄點解會家中有血壓計......
小茄解釋：其實係因為陀大女時，
每逢返醫院檢查血壓都會偏高，
當時瑪嘉烈果位高級醫生要求小茄自行在家要量血壓，
如果血壓持續偏高就需要入院，
所以老公立即買了血壓計回來，
而小茄亦每晚都量一量血壓.......
醫生聽後，似放心地說：咁你都繼續住自己係屋企量血壓就可以了！下星期再返黎見啦！記得有咩事唔好拖！立即入院！
小茄到預約處預約，
姑娘攞番記錄冊俾小茄，
及叮囑入院時一定要帶埋！
文職聽到說：如係在下次期前生得，就直接到K9，唔駛再理呢個期啦！
小茄有點愕然地想：未到預產期喎！
小茄離開醫院，
在屋企附近行左一陣，
之後才醒起：醫生好似冇提到乙型鏈球菌感染檢查報告，
但唔緊要啦！
因以政府野，
有野就一早講左啦！
既然醫生都冇講，
就唔多理會啦！
之後小茄趕回家準備接韻慈放學，
但小茄再次唔服氣，
所以再量血壓......
結果：106/59！？！？
(今次又係咁！有冇攪錯！激死茄啦！)
No comments:
Post a Comment