120414(預產期前最後一次) 產前檢查＠瑪麗醫院

由於預產期將近，
再加上因小B帶來的不適增加，
老公開始有點唔放心，
所以請假陪伴小茄返醫院做檢查，
其實係陀韻慈時同樣有呢個情況......
(小茄心想：好似好冇用咁！
又要老公擔心自己了！ :( )

由於今次都係約了9:30期，
所以小茄跟老公可以一起陪韻慈等校車，
但唔知咩原因，
今早校車遲到！
9:35才到站，
冇計啦！韻慈好大機會要遲到了！

待韻慈上校車後，
小茄跟老公乘小巴到醫院，
由於所有野都遲左少少，
所以今次都比以往兩次遲少少......
但唔緊要啦！
如果攪得太晏的話，
老公可以接韻慈校車，
咁小茄都唔會太緊張.......

小茄在登記處辦完手續，
又到了產檢三部曲：磅重、量血壓及驗小便啦！
－磅重：
在過去一星期，
小茄達標重足0.5kg丫！
現在正增長了6.227kg......
－量血壓：
134/93
較上兩次返醫院檢查好一點，
但由於上壓高過130下壓出現9X，
所以都需要等15分鐘覆檢.......
(小茄都習慣了！)
15分鐘後覆檢結果：
130/83
雖然數字回落，
姑娘都話正常，
但都要視乎醫生最後決定，
其實小茄心知：
如果醫生還是覺得偏高的話，
就會當小茄有妊娠高血壓，
到依家呢個週數就會立即約期催生......
(小茄唔想催生！)
－驗小便：
一如以往蛋白尿及尿糖都係-ve......
完成產檢三部曲，
小茄出番大堂等叫名見醫生，
老公覺得奇怪地問小茄：點解番親黎血壓都咁高嘅？
小茄摸不著頭腦地答：唔知喎！次次番醫院都係咁.....

今次等了約40分鐘，
小茄終於被叫名見醫生啦！
今次唔係上兩星期見的醫生，
而且房內有見習醫生添！
(其實幫到佢，
我都冇咩所謂，
都係咁做檢查遮......)
可能之前醫生已把小茄會在家量血壓一事入電腦，
所以今次醫生立即問小茄有關在家血壓數字，
小茄也把在家量血壓的記錄俾醫生睇，
醫生見到只是說：本來見到剛才的血壓結果係要立即約催生期，但睇埋在家的血壓數字，相信只係虛火，但要繼續自行在家量血壓，萬一見到血壓突然上升的話就一定要入院催生！
老公突然跟醫生說：係啦！唔知點解每次番醫院都會高.....
醫生只好說：有些媽媽係會有呢個情況的......

到摸肚、度肚及聽心跳：
－摸肚：
先由見習醫生實習先，
其實小茄覺得佢好細心地摸，
只不過落到肚底位的確有少少痛，
之後到醫生黎摸肚，
同樣係果個位都係有少少痛，
所以唔關見習醫生事......哈哈哈哈！
－度肚：
醫生在場，由見習醫生度......
－聽心跳：
都係醫生在場，
由見習醫生開機聽，
見習醫生搵到小B心跳之後就熄機，
但俾醫生提見習醫生應再聽耐少少......
(見習醫生要記住啦！)
在見習醫生再聽小B心跳時，
醫生幫小茄檢查有冇水腫問題，
(其實小茄完全明白，
如果血壓高再加上有水腫，
妊娠高血壓的徵狀都已經很明顯了！)
好在醫生見小茄沒有水腫問題，
(對丫！到呢個週數都冇水腫丫！)
所以醫生可以安心地否定小茄有妊娠高血壓了！

醫生突然跟小茄說：其實小B所有野都on-time，唔駛擔心！
小茄跟醫生說：其實依家最怕係要便便的時候，因怕有便意但又冇下落時就係小B要出世......
醫生風趣地說：可能今次唔會痛太耐，太痛就生到了！
(小茄心想：好似幾好喎！但生仔又點會唔痛呢？)
之後姑娘很細心地幫小茄抹去肚上的啫喱，
其實小茄有點唔習慣由姑娘抹，
但姑娘話要抹乾淨的.....

醫生繼續說：既然小B on-time，咁就繼續約番一星期檢查一次嘅期啦！但下次檢查就會約埋催生期啦！另外乙型鏈球菌感染檢查報告出左啦！-ve的！唔駛打抗生素！副本會夾埋係記錄冊，記得記錄冊跟身！
(好野！唔駛打針！ :P )

之後小茄到預約處預下次期，
小茄一心諗住下次檢查應該係good friday，
但小茄冇留意到good friday係公眾假期，
而公眾假期係沒有產前檢查服務的，
所以下次檢查會在公眾假期後啦！

又會咁岩嘅！？
跟韻慈時好似，
－預產期前最後一次檢查都有實習生在場，
韻慈時係護士學生；
(最記得佢地見到小茄個肚就好似嚇了一嚇，
之後話搵唔到個頭.....)
小B今次就係見習醫生，
－原來預產期都係公眾假期前後，
所以醫生都會話下次產檢要約催生期......

韻慈很準時地出世，
唔知小B今次會唔會都好似家姐咁準時呢？

WebRep

currentVote

noRating

noWeight